أكتب قصيدة والگلب مكسور

[ميقات]

اجيت أكتب قصيدة والگلب مكسور - من شلت القلم دمعاتي بعيوني

إجه وكت الزيارة وإسمي مو مكتوب - معقولة الأحبهم مايريدوني؟

أنه الخادم لخدّامك يبوالأحرار - يعني ويه الخدم لازم تكتبوني

مو منّه وأمِنها المِنَّة لك مولاي - خدمتكم شرف وعليها ربّوني

بس اتعودت كل مرة يامولاي - اشما أطلب طلب بالحال تنطوني

شما تقسى الظروف شما تزيد أخطار - اشما زاد الذبح واشما يمنعوني

أريد أتعنى ماشي الحضرتك يحسين - حافي وشايل اهمومي على امتوني

وأشرب بالمضايف (چاي أبوالسجاد) - وأحس بالجنّة گاعد من يضَيفوني

ماشي اشما أطب إلسيطرة مسرور - براحتكم أگلهم من يفتشوني

قطيفي الهوّية وجاي أزور احسين - أحييهم قبل ماهم يحييوني

بدون ازيارتك ماريده عمري يطول - يبوالسجاد بالحسرة تخلوني!!

إذا ماانكتب زاير إلك هالعام - وحق الزهرة أهوَن لو يدفنوني

عاين حالتي من الصبح للّيل - من كثر البچه متورّمه اجفوني

ابجي من اسمع الملا جليل يگول - ((يزوّار الحسين وياكم اخذوني ))