عنوني ..

فكرة لبس البحار حلووووة و غريبة !!

بس ولدي ما تصلح ليه لأنه ما يحب شي يربطه !!!

ثلج و نار ..

اشتري ليه بشت بيطلع يجنن به <<< شيخ !!

و ان شاء اني بعد معاج لي روحة الاسبوع الجاي سووق المنامة افتر و اشووف ..

و بالمناسبة رحت الحرز بارحة أمس روحة تفحصية :d49:

و منزلين توزيعات حلووووة و متنوعة بس اسعارهم شوي غالية ..

و ثياب شعبية تجننن و أكثر شي لفتني ثياب البنوتات طبعاً حلوووة و زاهية ..

و تصدقون من كثر ما شدتني نسيت اطالع ثياب الصبيان و اسأل عن سعرهم !!! <<< مو على حساب إن روحتي تفحصية !!!

حتى لمّا طلعت يقول لي زوجي شنو عجبج قلت ليه في عندهم ثوب مطرزة عجبتني يقول لي جم سعرها ؟؟ قلت ليه ما أدري ما سألتهم !!!

هلا والله اختي ام حسين

ابو ريال وابو ريالين في كل مكان بس اشهر شي واللي يجيب البضاعة الزينة محل المبارك ابو ريال وجنبه بالضبط الدنيا الصغيرة من ريال وطالع

هذول يصيروا في حي المحمدية الدمام مقابل الهرم بلازا جنب الاشارة على طول

ثلج ونار مرة حلوة التوزيعات احنا عندنا في القطيف نقتصر على الشيبسات والحلويات والالعاب والفلوس نكيسهم في كيس مع بعض وكل بيت يختلف عن الثاني وخاطري اجي البحرين يوم المولد اي يوم بالضبط بيصير مولد الامام الحجة

عنوني ماشاء الله اللهم صل على محمد وال محمد يجنن الثوم واكيد على بنتش بيكون احلى

ووصف المحل مثل ماقلت الى ام حسين يصير مقابل الهرم بلازا الدمام حي المحمديه وهذا الشارع مليان محلات ودايما نلاقي باصات من البحرين هناك

ودي اخذ الى اولادي لبس شعبي بس ابغى شي جديد عن اللي يلبسوه كل سنه وين عندكم اماكن شعبية خاصة للاولاد

مرحباااااااا جيتكم متاخرة عليكم بالعافية

المهم عجبني عنوني مال الامورة من وين ماخذتنا في المحرق ناوية شكلي اخذ لبنوتتي
اني سويت اليها فستان ناعم وحلو وياه بخنق
ولحد الان ما شريت اليها شي مترردة البسها اياه لان اخوي ماخذ لها ثياب من تركيا وسورياا وكيس الناصفة من سوريا عليه صورتهاااا

وبالنسبة للتوزيعات سويت السنوات الي قبل الاكياس والاورقنزا والتور وسلال وافكااااااار وايد
فكرة القرائين حلوة وجلدتهم بشرايط وحطيت بطايق كان عمر بنتي اسبوع في ناصفة رمضان
اللعام ناصفة رمضااان اخذت اكياس من جلااادات حلوين ومرتبين حطيت حلاوة وبيزات والعااب للجهال وسلة وربطته بشريطة واخذت سلة وخليت فيها دب وكانت توزيعات كبيرة وعجيبين
السنة ابي افكار غير فاخذت حصالات صغاااااار فخار وكاسات ومباخر واشكال وايد ومتنوعة من الفخااار وصبغتهم اني
واخذت حلاوة وجلادات وشرايط عشان اخليهم فيهم هذي فكرتي للاطفال وكانت في بالي الحرز للكبار بس ما شفت نفس فكرت ثلج ونار
بس حبيت اعرف من وين احصل الاحراز..
ان شاء الله اصورهم واخليهم اليكم
.

رياحين اتحصلين ثياب شعبية للاولاد في المنامة تشكيلات وايد
امي اخذت الى اخواني من هناك فصلت اليهم ثياب من المنامة وصديريات وقحافي يطلعون على الجهال حليوين

رياحين ..

مشكووورة أختي عالوصف .. يعني يصير في الجهة اللي فيها السعر المنافس و ستي ماكس و باقي المحلات ..

و بالنسبة للمولد راح يصادف ليلة الجمعة الإسبوع الجاي و حياج في البحرين تنورين .. و عن جد البحرين في ليالي المواليد لها رونق خاص تلاقي الزينة في كل مكان و في كل شارع يحتفلون و يوزعون الحلويات و ليالي الناصفة بتكون احلى طبعاً لأنها فرحة أكثر لأطفالنا الحلوووين و هم يتنقلون من بيت لبيت و من شارع لشارع و البهجة ترتسم على محياهم <<< كأني شوقتج للبحرين :d10:

أما الملابس الشعبية عندج سوق المنامة تحصلين خيارات متنوعة !!

أحلى ولاء ..

فكرة الأشكال الفخارية حلوووة وقبل كان في بالي حصالات فخار صغار للصغار راح يستانسون فيهم ..

بالنسبة للأحراز أكيد تحصلين في المكتبات .. روحي مكتبة فخراوي تحصلين أكيد ..

و بإنتظار الصور !!