[نور الولاية علي]

بسم الله الرحمن الرحيم

اللهم صل على محمد وآل محمد

السلام على الزهراءالبتول الطاهره وعلى وبعلها زبنيها والسر المستودع فيها

السلام على الحسين وعلى علي بن الحسين

وعلى اخيه وحامل لوائه ابا الفضل العباس

وعلى اخته وشريكته بالمصاب ام الحزن زينب

وعلى أولاد الحسين وعلى أصحاب الحسين

السلام عليكم وحمة الله وبركاته

بارك الله فيك وبك

مما قيل عن لسان فاطمة العليلة بنت الامام الحسين (عليهما السلام)

يا وحشة الدار – من بعد الاطهار

أتمنَّه لو يمهم – بعيوني اخدمهم – يا ربي سلِّمهم

من شر الاشرار

أنه ابدار الوحي اتربّيت – ابويه حسين ربّاني

ابزغر سنّي ويعلِّمني – اعله درب الصبر دلّاني

إصبري ايگلي يا طفله – طلع وابصبره وصّاني

إخذ كل اهلي من يمّي – وحيده ابداري خلّاني

سار الظعن سار – وابمهجتي النار

يا ربي يا حسبي – إرحمني يا ربّي – وارحم هظم گلبي

من شر الاشرار

إلهي يا إله الكون – يمن ليك الأمر يرجع

وسيعه جروح البگلبي – ولكن رحمتك أوسع

دعيت ابكسرة الخاطر – اجيتك أدعو بالمدمع

أريد لوالدي اترجعه – ابسلامه وكل هلي ترجع

شت عگلي واحتار – ما ظلت افكار

واسع الرحمه – يا دافع النقمه – إحفظ ابو اليمه

من شر الاشرار

أهيم ابمشرعة ليلي – وأطش اعله النجم همّي

وأتلمَّس ظلام الليل – أدوِّر عالگمر عمّي

أمس متنومسه ابظلَّه – اشوفه الليله مو يمّي

إحرسه يا إله الكون – وإرحم لوعتي وهظمي

ليل الوكت جار – ونجومه أشفار

ادعيت ابگلب هايم – يا ربي يا دايم – إحرس گمر هاشم

من شر الاشرار

غسل وجه الفجر دمعي – ومزجت الليل بالحسره

مكان الاكبر اگبالي – أشوفه وتطفح العبره

اگول هنا علي الاكبر – يگعد وأگعد ابكتره

علي ومن أنده بإسمه – يضمني ابلهفته لصدره

وين الأخو صار – ما وصلت اخبار

عالفرگه ما أگدر – يا من تزيل الشر – احفظ علي الأكبر

من شر الاشرار

أحس اهداب عيني ارماح – خذَتْ من عيني ضي عيني

لا غفوه اكسِرت جفني – ولا لهفه تصحّيني

عگب عبد الله صار الموت – مهد والهم يناغيني

خياله ما برح عني – يصبِّحني ويمسّيني

وهمومي أشجار – تسگيها الاعبار

لعبد الله ما أنسه – عني اختفت شمسه – يا خالق اتحرسه

من شر الاشرار

الليالي بكل دواهيها – عليَّ ابزوم تتوثَّب

عليله وللدمع موگد – لهيبه ابعيني يتنشَّب

لسكينه أنتحب مرَّه – ومرَّه لعمِّتي زينب

وأبد ما چنت اظن عنّي – رقيه اختي تتغيَّب

أتلمَّح آثار – ربّات الخمار

يا يوم الآگيهن – وين انشد اعليهن – يا ربي حاميهن

من شر الاشرار

الدمع يتسابگ اويه الهم - على الوجنات يتهامل

عليَّ الموت يتخطَّف – وعليَّ البين يتحامل

كل هذي وبعد آمال – عندي والگلب ما مل

وبعدها عيوني مشبوحه – وعلى الركبان تتأمَّل

ولكل ظعن مار – اتشخَّص انظار

وأدعو بگلب لاهب – يل طاعتك واجب – سلِّم بني غالب

من شر الاشرار